Ég vil snúa aftur!

Jæja þá er maður komin heim frá hinu yndislega Skotlandi. Ég elska Skotland. Þrátt fyrir það að það hafi rignt næstum allan tíman og flóð hafi eyðilagt nokkra bæi þá elska ég Skotland og get ekki beðið eftir því að fara þangað aftur. Nema næst ætla ég að vera að ferðast um allt landið á bílaleigubíl eða í rútu (Citylink) og gista á tjaldstæðum sem eru í hverjum bæ. Leið mín liggur samt sennilega í Findhorn næst. Nenni ekki að útskýra það betur. En Skotland er geggjað fallegt land. Rosalega mikill gróður og þar að leiðandi fullt af skógum. Og allstaðar má sjá hleðslur í stað gaddavírsgirðinga. Einnig er gaman að sjá beljurnar, sterakindurnar og fuglana lúlla saman á túnunum.

Eins og kannski einhverjir vita þá var ég veik þegar ég fór. Svo þetta var hryllilegasti dagur sem ég hef upplifað þ.e.a.s. Dagurinn sem ég ferðaðist til Skotlands. Minnstu munaði að ég hafi hætt við að fara rétt áður en ég fór í vélina. Svona var þetta skemmtilega-ó ferðalag.
Ég þurfti að fara að heiman uppá BSÍ og taka rútuna þaðan upp á völl og svo flaug ég til Skotlands, tók strætó af flugvellinum á lestarstöðina og tók svo leigubíl á rútustöðina þar sem ég þurfti að bíða í 2 klst. og tók svo rútu í 2 tíma í einhvern bæ þar sem ég beið í klst. og þar af 15-20 mín úti í rigningunni eftir að vera sótt til að keyra í 10 mín í viðbót í annan bæ. Ég hef aldrei verið jafn ánægð að vera komin á leiðarenda. Já skemmtilegt 12 veikindaferðalag. En ég er þó mjög fegin að hafa pínt mig til að fara og ekki hætt við.

Ég get nú ekki beðið eftir að fara í næsta ferðalag sumarsins en það mun vera ferð til Spánar þann 15 Júlí. En það getur þó verið að ég fari á eitthvað innanlandsvapp vikuna 4-12 júlí. Svo ef einhver er til í ferðalag og er ekki hræddur við hunda endilega skellið ykkur með mér.

Skotland, ó Skotland! Hér kemur Gréta!

Ég hef áhyggjur af vinkonu minni. Hef mikið hugsað um að senda hana til sálfræðings. Þannig er nefnilega komið fyrir þessari vinkonu minni að hún er með hitt kynið á heilanum og þar sem hún er ,,komin á fast´´ þá fær hún útrás í gegnum mig. Þessi vinkona mín segir úúúúú í hvert sinn sem ég tala við strák eða bara sé einn slíkan. Það skiptir ekki máli hvaða strákur það er, það getur verið kassagaur í einhverri matvöruversluninni eða bara gaur sem labbar fyrir framan bílinn minn þegar ég stoppa á umferðaljósum. Það sem lét mig hugsa um að senda hana til sálfræðings var stuttur bíltúr sem við fórum í í dag. Í þessum bíltúr sagði hún: ,,úúúúú ertu hrifin?´´ um 3 stráka og þetta var mjög stuttur bíltúr. Svo þar sem flest fólk skoðar jógúst og klósettpappír í Bónus skoðar hún súkkulaðirúsínur og starir á smokka. Sumir myndu bara segja að þessi stúlka væri eðlileg, en þá þekkja þeir hana ekki nógu vel. Kannski er hún bara sérstök en ég er enn á því að hún hefði bara gott af því að leita sér aðstoðar hjá sérfræðingi.

En hvað um það. Ég er á leiðinni til Skotlands snemma í fyrramálið. Tek flugrútuna kl. 4:45 frá BSÍ. Svo ég mun að öllum líkindum ekki blogga neitt í 9 daga. En kannski finn ég nú Internetcafé þarna í sveitum Skotlands og þá mun ég nú segja ykkur kæru vinir, kunningjar og aðrir hvað ég mun vera að aðhafast þarna í mér ókunnugu landi. Vona allavegana að það verði eitthvað ævintýri en þó ekki líkt og Hans og Grétu ævintýrið þar sem mér er illa við gamlar ljótar nornir sem pota í fólk með priki.
Jæja vinir ég kveð í bili!
Ykkar ástkæra

Reunion-dagurinn mikli!

Mmmmmmm... Ætli þessi dagur hafi verið svakalega skemmtilegur? Ætli ég hafi farið í vinnuna og svo á Reunionið mitt sem ég er búin að bíða eftir að fara á í lllaaanngan tíma? Ónei.. ég sit veik heima hjá mér að pína í mig eitthvað að borða sem mér finnst ógeðslegt eins og er. Það eina sem mig langar í er forstpinni og ég meika ekki að fara út í búð. Mér finnst ólýsanlega ömulegt að vera veik. Og til að kvarta meira þá er sjónvarpsdagskráin ömuleg á Laugardögum og það er ekki mikið annað hægt að gera þegar maður liggur veikur uppí sófa. En Fanney var að hringja frá Reunioninu og það er mjög gaman hjá þeim og fagna ég því, þá verður þetta allaveganna haldið aftur...vonandi sem fyrst.

Bless og snít, Hóst og krít.

Flensudrasl

Skemmtilegur dagur í dag. Ég vaknaði klukkan 7 eftir 4 tíma svefn. Skellti mér í sund með Svanhvíti og fór svo í vinnuna þar sem ég var að reita arfa. Eftir vinnu þ.e. í hádeginu fór ég bara heim og steinsofnaði og viti menn. Ég vaknaði fárveik. Með hita og beinverki og ég veit ekki hvað og hvað. En þrjóskan í mér sigrar ætíð og ég fór aftur í vinnuna á kvöldvakt. Ekki gaman að þurfa svo að fara heim fyrr. Hélt líka að ég myndi farast úr kulda á leiðinni heim.

Á morgunn hafði ég ætlað mér að mæta í vinnu og fara svo á reunion. Á sunnudaginn ætlaði ég að skreppa í bíltúr á Laugavatn og fara út að borða með Selmu og fólki í tilefni afmælis Selmu.
Svo nú sit ég og helli í mig Sólhatti með sinki og C vítamíni sem Stella keypti fyrir mig til að geta gert eitthvað af því sem ég ætlaði mér um helgina.

Ég vona að þið óskið mér góðs bata.

Bless og takk ekkert snakk.

hhmm Ég vil biðja það fólk sem ,,linkar´´á mig að afsaka mig af þeim sökum að ég ,,linka´´ ekki á þá. Ég hreinlega kann ekki að ,,linka´´ Svo kannski einhver af ykkur geti aðstoðað mig við þetta einhvern tíman.


Nú fer að styttast í Skotlandsferðina mína. Ég veit ekki við hverju má búast. Er þó eitthvað búin að reyna að kíkja á þetta á netinu en fann lítið. Fann reyndar bæ í um 30 mín fjarðlægð frá sumarhúsinu þar sem hægt er að stunda einhver vatnasport og fjallgöngur. Svo kannski maður skelli sér þangað í litla ævintýraferð.


En hann Vilhjálmur er orðinn óþekkur. Í hvert skipti sem ég fylli á dallinn hans og hann er búin að pikka út það sem hann vill borða (hann er matvandur) þá hvolfir hann honum! Súsanna og Gvendur segja að ég vanræki hann því ég er ekki alltaf að halda á honum. Kannski það sé satt en hann kúkar bara svo rosalega mikið og ég vil ekki vera öll út-kúkuð alltaf. Mig þykir samt vænt um litla greyið og ég ætla hér með að reyna að eyða meiri tíma með honum.

Göngum, göngum, göngum, uppá fjallið....

Í gær fór ég í vinnuna, í gær skrópaði ég í sund, í gær var ég að passa, gær fór ég í heimsókn, í gær fékk ég gest, í gær verslaði ég, í gær eldaði ég, í gær bakaði ég, í gær horfði ég á Lost, í gær gleymdi ég að taka Spirulína. Á Laugardaginn fer ég á skólamót.

Hér með auglýsi ég eftir fólki sem vill ganga með mér upp á Esju. Aðeins ein manneskja hefur skráð sig til leiks og er það hún Selma okkar Guðmundsdóttir. Þið hafið nú öll gott af því að ganga smá og fáum við okkur svo heitt súkkulaði þegar heim kemur og hver veit nema maður skelli ekki bara í vöfflur með.

Sumardagskráin 2005:
Maí: Kaupa bíl.
Júní: Fara til skotlands.
Júlí: Fara til Spánar.
Ágúst: Fara á Hornstrandir.

Já geggjað sumar. Og það sem meira er þá fer ég ekki á hausinn af þessu!

Ég fór í bátsferð með Svönu systir á Mánudaginn. Skoðuðum einhverjar eyjar út frá Stykkishólmi. Þar var aðaláhersla lögð á fuglategundir og bergmyndanir. Mjög áhugavert. Sáum Dýlaskarf, Toppskarf, Teista, Haförn, Æðafugla og fl. Einnig sáum við lárétt stuðlaberg. Já ég er nörd. Það sem stóð þó upp úr var það að neti var kastað út og í það komu fullt af krossfiskum, kröbbum, skeljum og ígulkerjum. Ég var í því að bjarga kröbbunum því þeir voru alltaf að detta á bakið og útlendingarnir þorðu því ekki, en við vorum einu íslendingarnir í ferðinni. Svo fengum við að gæða okkur á kræsingunum, hráum beint úr sjónum.. nammm. Hörpudiskarnir voru ´lang bestir og fengum við soldið af þeim því útlendingarnri þorðu ekki. ÆÆ þeir misstu af miklu.

Fór annars í sund í gær með Fanney og Ísaki. Það var gaman og ég brann í framan. Fékk einnig smá sundbolafar. Fór svo aftur kl. 8 í morgunn og skerpti aðeins á farinu. Ætli maður neyðist ekki til þess að fara í bikiní svo maður verði ekki með hvítan mallakút og ´mjög áberandi far á bakinu?!? ussusssvei.

Jæja kúkalakkar, krabbalabbar, kakkalakkar og krakkalabbar. Bið að heilsa öllum vinum ykkar og fjölskyldum krossfiskanna!

Beruvíkurbrjálæði.

Mmmmm... Í dag er gott veður. Ég elska gott veður því mér er alltaf svo kalt. ÉG vaknaði kl. 08:00 í morgunn til að passa prinsessuna og var það nú ekki slæmt enda stórskemmtilegt barn hún María. Svo skruppum við systurnar og María á rúntinn. Keyrðum í Beruvík en þar stoppaði allt í einu vegurinn og við þurftum að ganga að víkinni en það var bara hressandi. Í víkinni var svo eyðibýli á hól og geggjað útsýni þaðan. Ég ætla að kaupa þetta land þegar ég verð orðin moldrík og endurbyggja býlið ganga svo með svuntu og baka allan daginn og verða feit. Svo ætla ég líka að vera með þvottasnúrur úti við og 3 hunda og auðvitað Vilhjálm litla. Kannski ég fái mér einnig páfagauk sem talar svo ég geti talað við einhvern annan en sjálfa mig. Ohh mig hlakkar svo mikið til!

Ég finn fyrir söknuði að heiman. 3 vinkonur hafa spurt mig hvenær ég kæmi nú heim. Tvær hafa svo viðurkennt að þær sakni mín. Kannski voru þær að ljúga að mér, kannski ekki. En ég kem allavegana heim á þriðjudaginn.
Jæja elsku vinkonur þetta er lag til ykkar. Samdi það þó ekki sjálf.
Helgin er svo löng að líða, hversu lengi má ég bíða, fram á Þriðjudagskvöld o, o, o fram á þriðjudagskvöld. Við förum kannski í bíó og síðan barinn á, komumst kannsk í feitt það er allt opið til eitt. Helgin er svo....!

En annars var bíllinn minn gamli aldrei bilaður. Það þurfti bara að lemja á eitthvað og hann hrökk í gang. :) svo ef einhverjum vantar bíl þá fær hann fordinn minn ódýrt. Og munið að hann er kostagripur og færir hverjum sem á hann mikla gæfu og lukku! Einnig get ég reddað ókeypis blessun á hann! Það er ekki amalegt.

Jæja nú erum við að fara að grilla hamborgara úti á palli. Vona að það kvikni ekki í þeim. Það kviknaði nefnilega í grillinu í gær og ég fékk kolsvarta kartöflu. úbbalúbba.( eru það ekki dvergar? úbbalúbbas?)

Fjólubíll og skemmtiganga, blessuð sé minning hans.

Mér tókst enn einu sinni að skipta um password og komast inn á bloggdótið mitt. Gott er það.

Hvað gerði hún Anna Stella á fimmtudaginn? Jú hún keypti sér bíl! Hversu svakalegt er það! Já bíllinn minn gamli bilaði og ég skellti mér bara á nýjan. Það kemur því fólki sem hefur ferðast með mér í bílnum mínum varla á óvart að hann skildi bila og ég veit að það fólk sem er oft í bíl með mér fagnar nú ákaft. En ég verð að segja að mér þótti gamli bíllinn minn alveg ótrúlega góður vinur í 3 ár. Hann fór með mér út um allan bæ og kom mér til skóla og vinnu og hann fór meira að segja með mér nokkrum sinnum út á land. Hann hefur þjónað mér vel þessi gamli góði Ford. Blessuð sé minning hans.

Nýji bíllinn er annars svakaleg lúxus kerra fyrir mig. Í honum er t.d. bensínmælir sem virkar, aðvörunarljós sem virka, miðstöð sem virkar vel, rafmagn í rúðum, gott útvarp og síðast enn ekki síst Kasettutæki! Eigið þið nokkuð einhverjar góðar kasettur? Ég var nefnilega bara með skruðningsútvarp áður og svo er bíllinn líka fjólublár og flottur. Það fer nú enginn að gera grín að mér núna! mmmuuuuhahhahahaha!
Núna sit ég á Snæfellsnesinu og horfi út á Snæfellsjökul út um stóran stofugluggan. Í dag fór ég svo með systir minni henni elskulegu Svönu og Maríu litlu út á Djúpalónssand í góðan göngutúr. Mamma var búin að segja okkur frá einhverri svakalega fínni gönguleið sem átti að taka 1 klst. að ganga og við þyrftum þá 2 klst. því við þurftum að fara fram og til baka en svo komumst við að því að leiðin fram og til baka tekur 6 klst. það er aðeins of mikið labb enda vorum við líka með lítið barn með okkur. Við sátum svo í fjöruborðinu og horfðum á litla dordíngla synda í polli í einhverju glæsilegu bergi og hlustuðum á öldurnar skella sér á ströndina. Svo tíndi ég einnig 4 krossfiska sem höfðu þurkast í sólinni og einn flottan stein. Kvöldið endaði svo á grillmat úti á palli í kvöldsólinni með hvítvíni og bjór. Getur lífið verið eitthvað yndislegra?

Splendid!

Ég er nokkuð dugleg stúlka. Á fimmtudagskvöld horfði ég á Undankeppni Eurovisión í góðra vina hópi sem kom á heimili mitt með gleði í hjarta en fór sorgmætt heim. En nokkrar voru þó stúlkurnar sem skelltu sér á Riddarann og var ég ekki komin heim fyrr en kl 02:00 þá byrjaði ég að pakka niður ýmsu dóti því daginn eftir fór ég í vinnuna og svo beint vestur á Hellisand. Þar eyddi ég öllum deginum og vakti fram á nótt. Um morguninn vaknaði ég við að engillinn minn hún María ( www.maria-vidarsdottir.blogspot.com )kom uppí til mín. Svo lagði ég af stað í bæinn sem er næstum því 3 tíma akstur. Ég stoppaði í bænum ekki lengur en í 30 mín því ég fór í kaffiboð til Þorlákshafnar. Meiri akstur. Ég eyddi því deginum í gær í það að keyra og keyra meira.

Í gærkveldi fór ég svo í Eurovisión- kjólapartýi. Það var bara mjög gaman, þrátt fyrir það að hvorki Ísland né Pólland hafi náð að komast áfram en það eru löndin sem ég hélt með. Þessi lög og lag Noregs og Ungverjalands voru bestu lögin í keppninni að mínu mati en Evrópa er orðin klikkuð og örrugglega heyrnaskert. Pólskalagið var svo sungið allt kvöldið af mikilli innlifun. Skelltum okkur svo í Útskriftarveislu hjá Siggu vinkonu sem bauð upp á áfengi og pottrétti. Annan svo sterkan að fólk hefur örrugglega fengið góða drullu í morgunn.
Ég var edrú bæði Eurovisiókvöldin. Verð bara að koma því á framfæri.
Ég dag er glæsilegur dagur og ég er í fríi. Ég er að hugsa um að skella mér í sund í dag. Splendid!
Ef svo einhverjum langar að gera eitthvað skemmtilegt í dag endilega látið mig vita.
Chisinau!

I feel it in my fingers I feel it in my toes..

Ég fór í bæinn um helgina til þess að dansa. Ég dansaði og dansaði og fór svo í göngutúr upp Laugaveginn. Á þeirri göngu mætti ég dreng sem lenti í ,,böggi’’ við einhvern gaur. Drengurinn sem var alsaklaus greyið var að skemmta sér og ýtti í góðu við vinkonu sinni sem var að ég held kærasta gaurs sem kallaður er Guli kallinn. Guli kallinn varð alveg óður og reyndi að fá drenginn til að slást við sig sem drengurinn tók auðvitað ekki í mál. Í svolitla stund stóðum við fyrir utan skemmtistað og fylgdumst með Gula kallinum sem gekk á alla og reyndi að fá þá til að slást við sig án áraangurs og þegar svo slagsmál voru í því að brjótast út þá hljóp hann í áttina að þeim til að vera með og hann þekkti ekki einu sinni fólkið. Ég á mjög erfitt með að skilja svona fólk. Hver vill fá högg í magann og glóðarauga? Mér þykir það allavegana ekki eftirsótt. Ætli ég færi ekki bara að grenja?! En Guli kallinn er skrítnari, hann nefnilega elti okkur, nema að það hafi verið gulir kallar út um allt. En það efast ég um. Ég var nefnilega edrú.

Eins og áður hefur komið fram þá bý ég í Engihjalla. Ég hef þó búið næstum alla mína ævi í Breiðholti. Í gegnum árin hefur Breiðholtið haft slæmt orð á sér og hef ég heyrt að fólk myndi aldrei búa þar vegna þess að það sé óöruggt. Ég man samt ekki eftir því að morð hafi verið framið í Breiðholtinu, gæti þó skjátlast um það. En í Hjallanum hafa orðið tvö morð á stuttum tíma! Það er nú spurning hversu öruggur maður er hérna. Maður ætti kannski að fá sér hengilása á útidyrahurðina og líma aftur svalahurðina. Smygla inn meisi og butterfly hnífum. Læra svo Tai kwon do og Tai chi eða hvað þetta nú allt saman heitir. Losa sig við allt eitur, garn eða önnur bönd, hreinsiefni og hnífa (nema auðvitað butterflyinn sem væri falinn undir koddanum) Einnig væri sniðugt að hafa alla innanstokksmuni úr gúmmí eða léttu plasti og minnka kraftinn úr vatnskrönum heimilisins. Og fyrir alla muni að eiga enga kveikjara eða eldspítur og heldur enga spegla eða annað gler. Einnig væri flott að eiga skothelt vesti og fara aldrei án þess út í bílinn sinn sem þyfti líka að vera skotheldur með góðri samlæsingu.
Já kannski væri maður þá öruggur. Ég ætla að byrja á þessum umbreytingum í næstu viku og ég vona að nágrannarnir mínir geri slíkt hið sama því ekki vil ég verða fyrir andlegu áfalli heldur, og mér þykir svo vænt um þá granna. Maður verður að hugsa vel um sig.

I feel it in my fingers I fell it in my toes.... Munið þið eftir þessu lagi. Alveg stórskemmtilegt! Ég vildi að ég ætti kasettu-upptöku af mér syngja þetta lag þegar ég var lítil og segja að ég væri svo fín!

Vilhjálmur Brúskur naggagrey

Jæja þá fer ég að fara að leggja í hann. Ég þarf að skilja naggrísinn minn hann Vilhjálm eftir hjá Súsönnu. Ég vona bara að hann verði heill heilsu þegar ég kem, ég vona að hann verði ekki vannærður. Hún Súsanna er bara svo askoti hrædd við litla greyið. Svo ef einhver á leið hjá Engihjallanum fræga þá væri nú gott að viðkomandi myndi vera svo elskulegur að skella smá naggafóðri í skálina hjá honum Villa litla.

En ég óska eftir að fá vísbendingar um það hver var svona svakalega sniðugur að skrá Súsönnu í Djúpulaugina hahahaha. Mér þótti það hreint alveg frábært og hefur viðkomandi glatt mitt litla hjarta á þessum gráa mánudagsmorgni!

Bless, bless og verið öll hress!

mmmmmm....slurp.

Í gær var matarklúbbur hjá mér. Já ég er kelling í matarklúbbi. Við vorum 3 ungar dömur sem stofnuðum þennan stórskemmtilega klúbb fyrir rúmlega ári síðan og síðan hafa bæst við 4 dömur í viðbót. Þetta er nefnilega ansi vinsællt. Einn vinur minn (kk) viðurkenndi meira að segja einu sinni fyrir mér að honum langaði mikið til að vera með í klúbbnum okkar en hann hefur ekki ennþá fengið inngöngu greyið. Í gær voru glæsilegar snittur í forrétt, fínasti salatbar með öllu í aðalrétt og gómsæt súkkulaði kaka í eftirrétt. Svo er auðvitað alltaf einhverjir skemmtilegir drykkir og í gær voru lífrænt ræktaðir ávaxtadrykkir og suðrænn og svalandi sumardrykkur. Ég hvet alla til að stofna svona klúbb því það er alltaf gott að fá sér 3 rétta máltíð og svo er þetta stórgóð afsökun fyrir áfengisdrykkju því þessi kvöld enda alltaf með partýi eða niðri í bæ.

Jæja ég mun vera internet laus í 4 daga núna. Ég er að fara í sumarbústað. Því miður er ég ekki nógu dugleg að fylgjast með veðurfréttunum svo ég veit ekkert hvort ég komi brún eða grá heim.

Hummm...ætli maður skelli sér ekki bara á hlaupabretti í dag.

Ferðalag.

Haldið þið að draugar bíti mann í tærnar er maður situr á kamri vestur á Dröngum?
Haldið þið að maður verði ósýnilegur er maður er búinn að vera þar í viku?
Haldið þið að flugfiskar og sundfuglar trufli skipstjórann á leiðinni að Dröngum?
Haldið þið að maður komist aftur í framtíðina eftir dvöl þar í viku?

Ég er að fara út í rassgat í sumar með elskulegu fjölskyldunni minni. Þar er ekki sími. Þar er ekki klósett. Þar er ekkert nema við, eitt hús, draugar, kamar og fuglar.

Riddarinn góði

Ég bý í Engihjalla og það getur stundum verið einmannalegt. En nýlega fundum við Súsanna út hvað Engihjallingar gera sér til gamans þegar enginn nennir að heimsækja þá. Jú þeir skella sér á Riddaran sem er hverfisbarinn. Engihjallabarinn. En þangað skelltum við Súsanna sambýlingur okkur á mánudaginn var. Þessi yndislega stúlka var svo góð að bjóða mér í hvítvínsglas á þessum svakalega kósí, heimilislega bar. Þar sem allir þekktu alla nema okkur. Í framtíðinni mun ég stunda þennan stað óhrædd því þar eru engir rónar en ég hef verið hrædd um það í marga mánuði og farið mikils á mis.
Talandi um róna þá á ég vinkonu sem laðar að sér róna.´Allir rónarnir í Reykjavík virðast vera jafn hrifnir af henni en hún er skíthrædd við þá og hleypur oftast í burtu er þeir nálgast. Enda ekki skrítið þar sem að róni tosaði einu sinni í hárið á henni í Kolaportinu. Ég varð vitni að þeirri lífsreynlu hennar og greyið stúlkan varð skelfingulostin. (Þú veist hver þú ert elskan)

Núna er ég stödd ,,undir jökli'' ´hjá henni móður minni. Í friðsælli náttúruparadís að anda að mér ómenguðu lofti og er það nauðsynlegt að gera endrum og sinnum til að lifa af. Elsku systir mín er nú að koma heim í heimsókn á næstunni með elsku litlu dóttur sína, prinsessuna Maríu. En sú familia býr í Barcelona og er þær koma heim ætla ég að eyða miklum tíma í að skoða nesið með þeim og anda að mér enn meira fersku lofti og draga að mér orku úr jöklinum. Það er heilbrigt og ég er heilbrigð.

Peningar, myndlist og rugludallar.

Ég er orðin allveg nokkuð vel pirruð á peningaplokkuninni sem á sér stað í heiminum í dag. Um daginn ákvað ég að drífa mig í akstursmat til að endurnýja ökuskírteinið mitt og viti menn, ég þurfti að borga 5000 kr. fyrir það eitt að rúnta um bæinn með ökukennaranum mínum. Allt í lagi. Svo þurfti ég að láta taka mynd af mér en ég og sús sambýlingur fórum í passamyndaklefa og létum taka glæsilegar myndir af okkur og kostaði það 500 kr. Þegar ég´fór svo að skila inn myndinni og akstursmatsblaðinu hjá sýslumanninum í Kópavogi var ég send yfir til gjaldkera þar sem ég átti að borga 3900 kr! Ég er fátæk, mjög fátæk. Hvar er Hrói Höttur þegar maður þarfnast hans?

Ég ætla að titla mig myndlistakonu. Þegar ég kynni mig þá segi ég að ég sé annas myndlistakona. Ég er nefnilega alltaf að mála. Það þýðir samt ekki að ég hafi einhverja hæfileika ónei. Ég hef ekki einu sinni hugmyndaflug fyrir það. Ég málaði þó flotta mynd áðan. Ég ætla að gefa Svanhvíti vinkonu minni hana í afmælisgjöf. En hugmyndin af sjálfri myndinni er stolin. Ég stal henni af 5 ára stúlku sem er á leikskólanum hennar súsönnu. Ég hermdi eigilega allveg eftir henni. Hún er glæslileg... en samt svolítið skuggaleg.

En ég er líka orðin rugluð. Ég hugsa ekki áður en ég framkvæmi. Um daginn var ég að drífa mig svo mikið út á svalir að blása sápukúlur að ég hoppaði upp í ljósið í stofunni minni og fékk kúlu, hefði viljað gráta en gat það ekki. Það komu þó furðuleg hljóð út úr mér. Ég fékk svo stól að gjöf um daginn og ríf hann´úr pakkanum og byrja að klippa á einhver bönd. Eftir að ég var búin að klippa all mörg bönd og furða mig á tilgangsleysi þeirra þá fattaði ég að þessi bönd héldu manni uppi er maður sest í stólinn. Og að lokum þá var ég að þvo á mér hárið í gær og fannst sjampóið eitthvað skrítið. Leit svo til hliðar og uppgötvaði að ég hafi sett Gillette raksápu í hárið á mér.
Ef ég vissi í hvaða heimi ég væri í.

Vefritun

Jæja já. Ég hef þá orðið að ósk vinkonu minnar og sambýliskonu. Það er að segja að byrja að rita niður hugsanir mínar og gjörðir á Alheimsvefinn mikla. En hún hefur suðað í mér nokkurn tíma að byrja á þessu og svo varð það bara úr að hún neyddi mig bara til þess að gera þetta, enda er þetta frekar pínleg færsla.

En nú ætla ég að segja frá athöfnum mínum um helgina bara svona til að segja frá einhverju.
Á föstudagskvöldið fór ég með nokkrum góðum vinum niður í bæ þ.e.a.s. þeim Sús, Fanney og Bigga. Þar fengum við okkur í glös ( Þó nokkur) og já...skemmtum okkur mjög vel. Vorum einnig með eplasnafs flösku sem einhver ældi svo á. Hittum eitthvað fellapakk, einnig hitti ég nokkra gamla kunningja og fólk sem baðaði sig í tjörninni. Ég skil samt ekki hvað fær fólk til að baða sig í tjörninni. Hvað er ekki í henni??? Þetta er bara vatn fullt af andahlandi og hægðum og örrugglega líka slíkt úr manneskjum. Kvöldið endaði svo á þriggja manna Shrek partý með hamborgurum af hamborgaravagninum.
Á Laugardaginn var ég svo ekki þunn. En það hefur aldrei gerst áður. Ég býst við því að það sé Spirulína frá Life Stream að þakka. En ég er byrjuð að taka þessa blágrænu þörunga eins og hálf þjóðin enda er þetta svakalega sniðugt! Í hressleika okkar fórum ég og súsanna á flakk á hlaupahjólunum/hlaupabrettunum okkar niðrí bæ. Fórum í Kolaportið og keyptum hunangsreyktan lax og gerðumst heimsforeldrar UNISEF en ég mæli eindregið með því. Deginum lauk svo með ferð í Húsdýragarðinn en þar var frítt inn. Sáum við fullt af gervi fuglum hangangi í trjám og feit svín sem ætluðu að kremja mús sem kíkti í heimsókn til þeirra. Á leiðinni út mættum við svo innskeifum kunningja og eyðilögðum næstum bílinn minn.
Ég nenni ekki að segja frá restinni enda er hún ekki nærri því eins merkileg og þessir stórmerkilegu atburðir sem ég hef ritað hér að ofan.
Ég vona þó að það verði ögn meira varið í framtíðarfærslur mínar en það getur tíminn einn leitt í ljós.

Best að prófa sig áfram

PrufaPrufaPrufaPrufaPrufaPrufaPrufa